دلوقتي انا كنت طول عمري ملتزم وبصلي امام بالناس.. لحد ما وصلت لسن 17 سنة في 3 ثانوي.. صاحبت ناس مش كويسة.. شربت سجاير ومخدرات ونسوان وكنت مفضوح لناس كتير وانا في قرية.. جات 2019 اتسجنت سياسي لمدة شهر والبلد كلها عرفت.. خرجت من السجن كملت شرب ونسوان بكترة وكنت مفضوح.. وكنت بصلي امام وكنت برضو بعمل اللي بعمله.. لحد ما جيت سنة 2022 انقطعت عن الناس وتبت.. فضلت بس اشرب سجاير لحد دلوقتي لكن في الخفاء تماما.. اللي عرف ناس بسيطة.. زي اخواتي.. وبنات كنت على علاقة بيهم.. وصديقي المقرب.. وتلاتة بيصلوا ورايا عرفوا بالصدفة لما كنت بشرب في مكان معزول.. وكمان أثناء الفترة دي اللي انا كنت فيها في صورة شيخ.. ضعفت وعكيت مع كذا بنت.. يعني كلمتهم كلام حب وكلام مش كويس.. بعضهم تعايش.. وبعضهم استغرب وعملي بلوك.. عكيت كتير للأسف.

انا كنت مغيب في الفترة دي.. معنديش وعي باللي بعمله.. لدرجة كنت بفضح نفسي وعادي.. كنت فعلا مغيب مغيب.. وماعرفش ازاي كنت كده

المهم.. 

دلوقتي انا اتشهرت بالقران والصوت زيادة عن اللازم والناس بتحترمني وبعطي دروس قران..

فكرة ان ناس كتير كانت عارفة عني كده تعباني نفسيا.. وبلوم نفسي ازاي كنت بفضح نفسي..

ومتدمر نفسيا لدرجة حاسس اني ناقص.. وبحسد المشايخ التانية اللي محدش يعرف عنها حاجة..

دلوقتي انا هبطل.. طب بالنسبة للناس الكتير اللي كانت عارفة.. طب بالنسبة للقليلين اللي عارفين اني بشرب اثناء فترة امامتي ومشيختي..

طب بالنسبة للبنات الكتير اللي عكيت معاها دي.. وماعرفش ازاي مافكرتش في ربنا ولا في نفسي حتى! ومافكرتش انهم ممكن يفضحوني أو على الاقل ينظرولي نظرة وحشة من جواهم.. اللي هو ازاي ده بيتقال عليه شيخ وكده

حاسس ان سمعتي بايظة او ممكن تبوظ.. وحاسس ان رزقي ممكن يقل في دروس القران بسبب كده..

حاسس اني انتهيت.. مع ان لسه ماحصلش موقف معين.. بس حاسس انه بيحصل من ورايا..

بس انا عاوز اتوب.. عاوز ارجع كأني لسه مولود بس للأسف ماينفعش.. الحل إيه؟